Carita Pondok (Carpon)

Yasana: Cinta Wahyu Lestari

    Rap kaos lékmong katut anderok pungsat némbongkeun pingping nu geus maju ka péot, lédak-lédak wedak jeung lipensetip nu beureum urahak teu poho sebrot-sebrot minyak seungit murahan nu segak kaambeuna.
"Geulis, mamah angkat heula nya, kadé Si Dédé antosan!" ceuk kuring ka budak nomber tilu, kabéhna budak téh aya opat.

    Reg angkot eureun, jrut kuring turun laju mayar ongkos. Kuring nyingkur néang tempat nu rada poék, gék diuk dina korsi taman. Cetrék ngahurungkeun roko, pelenyun udud bari jeung panon mah rut-rét néang lalaki léngér nu biasa jadi palanggan. Bréh, di béh kidul aya wanoja tiluan ngarora kénéh gareulis deuih. Sigana sarua jeung kuring nungguan nu rék datang, sidik béda katempona, ogé tina rindat panon jeung papakéan. Duh ...! Beuki euweuh wé langganan téh, pikir kuring ngaheruk. Nepikeun ka tilu jamna kuring nungguan langganan bet euweuh hiji-hiji acan nu datang, kuring geus luh-lah inget ka budak nu di imah, tangtu barudak téh nungguan kuring bari jeung kudu angkaribung.
Parat nepi ka janari gedé euweuh nu ngarérét ka kuring.

    Gap kana eunteung leutik, nyidik-nyidik beungeut sorangan.
"Bener manéh téh geus kolot, kulit geus tinggal péotna, pantes teu payu ogé da pasti ari nu meuli mah hayangna nu seger tur alus," gerentes haté kuring.

   Jung nangtung rék balik waè teu meunang duit ogé, dalah kudu dikumahakeun, kuring randa anak opat nu ditinggalkeun maot ku salaki sapuluh taun ka tukang, éstu taya andelkeuneuneun tina diri téh, dagang suwung waragad, ari beuteung mah anggeur kudu dieusian.
   Hawar-hawar kadéngé haleuang di sajoreun gedog sigrong, dirasa tembangna Titik Puspa "Kupu-kupu Malam", rembey cikaséér nyimbeuhan sakujur nu ngan jadi lacur.

#SCS_Carpon_Ciwal.

Balik deui ka beranda, klik di dieu!